煤轉氣受益龍頭股

2018-01-05 12:41:37
分享至Facebook 分享至Weibo 分享至LinkedIn 複製網址

今年要留意石油及天然氣板塊,今個星期油股已經先行一步,油價創兩年半高位,大摩唱好油股及油服股,甚至你話佢地係炒落後,全部都言之成理。去年油價57蚊起步,年中跌穿44蚊,年尾就重上60,全年升幅有數得計,咁舊年油股大落後唔升,都情有可原,再加上最藥煲的中石油(0857)係石油幫的根據地,政治上點都蝕底啲,所以如果你要買油股,中海油(0883)係不二之選。

今次想講的係昆侖能源(0135),佢都係中石油嫡系,會唔會又蝕底呀?不過佢既有油又有天然氣,而兩者價格都係上升周期,業務主要在上游,絕對係食兩家茶禮,而最吸引青冰的,就是天然氣那邊的改革。內地為咗清新的空氣,煤轉氣雷厲風行咁進行,所以價格趨升,但由於供應不足,連帶國際天然氣價格都扯埋上去。上個月東北部嚴寒,更加出現氣荒,窮鄉要挨凍的新聞,及後就放寬番俾大家燒煤過冬,平息民怨。

要深入分析天然氣板塊及改革,青冰未必係個皮,不過要睇昆侖,只需看幾個重點。2016年油氣唔掂,佢地下半年要蝕錢,全年只賺5億人仔,慘情,不過去年上半年回復正常,已賺24億,所以黎緊的全年業績,盈利增長好可能有10倍,因為唔好忘記下半年先係油氣價格急升之時。

一直以來,管道輸氣收入係昆侖的殺著,2016年更佔8成盈利,但使用率長期100%,有強勁需求都冇得多賺,不過陝京四線管道在11月開始營運,輸氣能力激增7成,換言之在2018年,佢地可以賺更多。現時大行對佢的睇法都係較保守,所以如果公司有更多的消息公佈,如發盈喜或陝京四線的update,咁上調評級就變得順理成章。

中石油咁弱都在今星期翻生了,昆侖現價是兩年高位,論強勢可能比中海油更強,候低收集,等待好消息吧。



留言
細看合和私有化

合和(0054)私有化正式公布私有化價格,係38.8元。由於合和為老牌華資股,講真新一輩對佢認識不深,又冇乜特別概念可炒,應該提唔起興趣去買,但其實都不失為一個好的case study,今次就寫佢吧。私有化主要有兩個形式,全購及協議形式。要約人在出價時的通告中,會清楚列明當時的「一致行動人士」的持股數目及「無利害關係股東」的持股數目,無利害關係股東持股數字十分重要,因為日後投票及計數,就是用這個作基數。在全購的情況下,無利害關係股東持股中,必須有90%以上接納,便算成功,可以強制性收購餘下股份;如是協議形式,首先要得到出席投票的無利害關係股東75%贊成,及少於所有無利害關係股東10%反對,才會獲得通過,而以上只是限於在香港註冊的公司,如果在開曼群島或百慕達等離岸地方註冊的話,要加上一個最辣的條款,就是出席投票的無利害關係股東,在人數上至少要有50%贊成,亦即係數人頭。其實以往香港註冊的公司都要數人頭,但08年電盈提出私有化時,爆出種票事件,即使私有化成功,但證監提出上訴,最終將私有化拉倒,促使政府在14年修訂公司條例,取消數人頭。今次提私有化的要約人,是主席胡應湘夫婦的私人公司,董事人員只是他倆,並沒有包括兒子胡文新,如私有化成功,持有3.34%股權的阿仔,都要被逼沽貨了。雖然阿仔係被收購,但由於在法理上,仍屬於一致行數人士,阿仔係冇得投票的。究竟是否不和,留待戰友自己思考吧。於公佈日期,合和總發行股本有8.68億股,要約人財團(包括胡應湘夫婦、家族成員、信託及老臣子何炳章)共持有3.2億股,沒參與要約的胡文新、其公公及舅父三人共持約3000萬股。以上全部是一致行動人士,共持3.5億股,約40.41%,換言之非利害關係股份就有5.17億股,約59.59%。根據協議形式的規則,要通過就要出席股東的75%贊成,當全部出席,就要3.877億股,反對票就以全部無利害股東計,即有5176萬股反對就可以拉倒。一般來說,全購是較易達成,用市場術語,只要收得夠乾,歸源歸邊,計好數出價,成功率較高,用協議形式,始終涉及出席會議的股東投票甚至要數人頭,變數大較難掌握,胡生捨易取難,理應是好有信心。有行家分析得好,指合和已上市46年,好多老股東或移民或去世,繼承者根本唔知有持股,要達90%的門檻其實更難。另有分析指,基金Southeastern Asset Management持有6000萬股,其實佢的一票已足以否決議案,所以通過機會不大,但又要咁睇,咁大單嘢,大家都識計的數,胡生會不作事先摸底就去出價嗎?亦有指胡生斥二百億私有化,係沉重負擔,但合和本身持有凈現金83億,而最近十年派息從無間斷,胡生收的股息已達60億元,七除八扣之下,其實真正掏荷包的,遠比大家想像的少。說回作價,雖然38.8元是11年高位,但仍較每股NAV存有35%折讓,是否好價,真係兩睇,但就不是志在必得價囉,最弊就係通告寫明不會加價,小股東真係陷於兩難啊。早前國浩(0053)私有化,同是採用協議方式,同是股價長期折讓,出價同是較NAV折讓約三成,最終是失敗而回。睇返市場反應,似乎都認同此點,執筆之時,股價是32.90,距私有化作價有15%,近年成功私有化的例子,都甚少復牌後同作價差咁遠,這亦反應了市場看淡成功率,先沽為上,當然,距投票日子尚遠,以2018咁多出奇不意之事,Never say Never啊。

從閱文來到寶寶樹

戰友位公子下星期就一歲生日,大家不禁老土地慨嘆時光飛逝,還記得一年前這刻還在悉尼旅遊,行程唔緊密但有點忙亂,就是因為忙著越洋沽售當時火熱的IPO雷蛇(1337)及易鑫(2858),還有就是上機前以開市價即daylow價90元沽出閱文(0772),一年過去,無論在上市首日用咩價沽出,現在回看也難免失笑。去年十一月這IPO三寶,最多人認同的必是閱文,無論從概念、血統及前景,都屬優秀,只係估值貴,當日以歷史市盈率100倍上市,首天股價仲升多一倍,過千億市值但只賺5億幾,但坊間分析仲係貴得有道理,因為增長是幾何級數攀升,加上有騰訊加持。早幾個月公佈的半年業績的確高增長啊,半年賺5億人仔,但股價已從高位腰斬。至於雷蛇及協鑫,上市前已經係蝕錢,受到熱捧只是時勢造英雄,加上有誠哥及騰訊效應。雷蛇這年來好似出咗幾款手機,亦動用了近億元現金去回購股份,但現價仍比高位跌78%。而協鑫呢,坦白說青冰在一年前及現在,都係唔太了解佢做乜的,只知道上市前蝕錢,現在都係,最離奇係從經營所得的現金流,現仍是負數,所以從上市首天的10蚊跌至2蚊,非常合理。IPO市場,氣氛決定一切,甚麼時候要合埋眼抽,甚麼時候要細讀本招股書,也不難分辨,現時氣氛咁差,仲堅持要招股的,急需資金是固然,估值就肯定低。早幾日有戰友問寶寶樹(1761)得唔得,心諗概念都算獨特喎,是否國內版的Babykingdom呢?所以即刻去睇吓本招股書,點知睇完涼了半截,呢隻又係蝕住錢上市,但扣除22億的金融負債公允值變動,上半年仲有1億人仔的經營利潤,又因為這批價值近87億的「附有優先權的金融工具」,佢地截至6月底,權益額是負68億,權益,即係資產減負債囉,換言之,即係負資產公司,咁你又唔使太驚,只要佢地成功上市,這負債會轉換成股本,即係話即使下限6.12元定價,權益額即時升至31億。如果公司未能在2020年10月前上市,持有這些"負債"的股東,包括阿里巴巴,就有權要求公司或始創人回水的,換言之上市就是勝利,巴巴亦安然持有近一成股權喇。睇完咁多嘢,相信戰友對這個babykingdom概念的觀感,一定好極有限,無計啦,只嘆你生不逢時,一年前出世,有巴巴加持,肯定熱爆飛天,甚麼負資產負現金流,都先孖為敬呀。

從俄鋁看止蝕的藝術

中美俄三大國政治角力,局勢發展並未如大家預期般和氣收場,反而愈演愈烈,美國商務部突然禁止美國企業在七年內向中興通訊(00763)出售零件,更令市場大失預算,去年熱炒的電訊及手機設備股全部蒙上陰霾。那邊廂,俄鋁(00486)自四月初被美國制裁後,股價持續暴挫,當特朗普對俄羅斯制裁口氣稍為軟化,「醒目」的投資者撈底入市時,俄鋁周三股價卻再挫7.8%。在這個大上大落的動盪市當中,任何和世界強國有貿易往來和商業聯繫的公司,都隨時成為下一個被報復的對象。西諺有云,don’t try to catch a falling knife,與其諗撈底,不如反思一下,突發事件下的止蝕策略。以俄鋁為例子, 老友K仔早在兩年前便以$3買入,原因不外乎公司現金流改善,開始派息, 理智分析之下落注,兩年內股價最高曾見$6.36。冷不防特朗普在通俄案嫌疑下,忽然公布針對俄羅斯的制裁名單,俄鋁名列榜上,制裁名單公布前的周五,公司股價仍在$4.64,4月9號開市,股價暴挫,中午已直插至$2.9。事後孔明,9號開市的早上,K仔不問價沽貨,還可平手離場(題外話當日有KOL聲稱重注all in),不過止蝕從來不容易,現在跌至殘價$1.4,止蝕就顯得無謂。世事沒有如果,到了中興通訊復牌之日,是否應該汲取教訓,不問價先走為敬呢? 上年瑞聲科技(2018)被沽空機構唱衰,復牌後強力反彈,股價尤勝從前,說明並非所有突發事件都需要驚青止蝕,但如果要為止蝕定一個準則,我會以「流動性」和「結構性」這兩點來界定。財經傳媒的報道多數集中講P&L,但其實一間公司死亡救唔返,更多是cash flow 出問題,突發事件發生下,沽盤人踩人,根本沒有時間去判斷觸發沽盤的負面新聞又幾嚴重?不過大方向可以咁諗,這些負面指控有幾成真?會否導至銀行call loan?會否引發公司流動現金、償債能力大受影響,從而引發資金問題?假如公司的Balance sheet很健全,盈利警告、炒燶期油、匯兌虧損之類的問題,假以時間也可以修復,股價狂跌一日之後,也可能死貓彈一下, 稍作分析才決定去留也未算太遲,未必需要急着在頭一、兩個鐘做決定。回頭說俄鋁這個例子,倒是值得一開市有價就馬上走,因為美國制裁是國家級行為,而且正正是切中公司流動性的要害。俄鋁的公司營運在今次制裁中所受影響非常大。簡單而言,俄鋁的資產被凍結、生意被禁止、信貸被終止。最明顯的風險是信貸責任出現技術性違約,現時穆迪和惠譽已撤銷其信用評級,雖然俄羅斯政府將提供短期流動性及其他援助,公司仍有潛在清盤和突然停牌的機會。美國的制裁就是要令俄鋁從商業世界中消失,being invisible。現時彭博已不會為俄鋁報價,不少銀行和經紀行已停止俄鋁的股票交易,或只可賣不可買。第二個值得馬上驚青止蝕的死穴,是結構性問題。中興通訊就是示範之作。中興的情況是,美國企業七年不準賣零件給中興,斷了公司的生產供應鏈,雖然很多香港人對中國崛起之說不以為言,但美國的行動,明顯是忌諱中國在科技方面彎道超車,趁自己在芯片等高科技領域上還有優勢,剎停中國在科技上的侵略。美國對中國科技上的制裁恐怕只是剛開始,中興如何交貨,引發的漣漪效應, 影響面亦是未知之數,如果搏特朗普在制裁俄國,出手對付中國科技企業方面,只是一時意氣,搶下風頭,那難免只是自我安慰。2018年,是鍛練股市逃生技能的時候,看誰能赢到最後。

如八達通只剩下車票

昨天港鐵(0066)公佈全年業績,最令人注意的,反而是八達通盈利竟然按年大減三成,係七年以來首次錄得倒退,事有湊巧,昨天支付寶香港就搞咗個啟動禮,焦點就係霍建寧都有代表長和出席,因為佢地去年就同螞蟻金服組合資公司,結合長和全港的零售網絡及支付寶的技術,爭做香港支付界的一哥。​​​​​​​八達通由搭地鐵必備而起家,一直擴展至各大小商戶,在小額支付上,基本上係完勝信用卡,「嘟」 一下就搞掂,係爽嘅。但可能係香港市場本身唔夠大,空間有限,八達通的發展有點停滯不前,你睇國內的支付寶及微信支付,市場大空間大,應用範圍廣,兩大巨頭自然更樂於掟錢投資,為的可能就係背後的大數據。過江龍現時拍住誠哥,可謂非常著數,佢地除咗有百佳及屈臣氏等零售點,仲有電訊及電力公司,唔好忘記仲有一個龐大的地產網絡,私人屋苑的會所及旗下商場,如果全部逼你用支付寶,呢條數都幾襟計。支付寶宣佈已經累積過百萬用戶現時去食野或者買野,在電子支付上已經有好多選擇,青冰較常用Applepay,八達通就主要用作乘搭公共交通及出入停車場,尤其是後者,每當你到商場消費,獲得幾小時的免費泊車,用八達通去繳費處搞手續,係方便好多,如果日後Applepay或支付寶可以殺入停車場,青冰都唔介意使用。講到呢度,似乎八達通最後及最穩固的城池,就是公共交通,相信可見的將來,搭地鐵不可能用其他支付方法吧,但如果日後萎縮到得番搭車搭船,咁八達通就只會變番一張車票了。如果港鐵是一間私人公司,肯定早幾年便已將八達通分拆出來,每年有兩幾億盈利,電子支付市場一哥喎,賣三十倍PE應冇問題,咁樣袋番一筆,對港鐵股東絕對有交代,可惜佢地大股東係政府,加價都會引來八方圍攻,如果有人敢提出分拆,政客亦肯定會將八達通跟領展(0823)當年上市相提並論,最後應該都係算把啦。圖片來源:八達通網站/ unwirehk

大股東唔想你買

騰訊(0700)及阿里巴巴頻頻佈局實體零售行業,百貨公司係其中一環,巴巴仲私有化銀泰百貨及入股高鑫零售(6808)添,本來百盛(3368)身為內地百貨公司,有炒作概念,青冰在去年亦有推介,貪佢有併購及私有化誘因,奈何搞咗成年都只有間歇性炒作,未成大器,上星期五公佈的業績,似乎都更清楚顯示了大股東的意途,就係唔想你買。百盛16年底賣北京物業,袋咗23億人仔,已經令市場憧憬佢地會派特別息,不過佢地去年公佈全年業績,只係象徵式派兩仙,收番黎的現金,全部去晒保本存款,好啦,因為你有5億美元負債,可能你留錢還債呢,等了又等,佢地上月公佈,向債券持有人回購債券,最後只有一半持有人應允,都叫做成功減債吖,不過上星期從業績公告中睇到,原來佢地係問銀行借錢去回購債券,但留意番佢地保本存款仍有32億人仔,亦無啦啦多咗16億金融資產,手頭咁多閒錢,點都唔應該問銀行伸手去還債囉,至於個16億係乜,遲啲出年報可以再睇真啲。去年純利係虧損1.35億人仔,一睇就唔開胃,但當中有1億係一單訴訟案的和解費用撥備,而此案複雜中帶點可笑,當中牽涉幾間國內公司,而重點卻係原訴人是一間馬來西亞公司,亦係大股東鍾廷森旗下的公司,換句話說,就係自己人告番自己人,來龍去脈誰對誰錯不用深究,本身件案係百盛勝訴,而馬來西亞公司決定上訴,就以這個窮追的舉動黎睇,都已經夠搞笑,按通告講,最後和解金額應該唔止1億,對於百盛的小股東來說,就肯定笑唔出。不過你又唔需要擔心,百盛的小股東包括同業金鷹(3308),13年舉牌後持續增持,依家已經持有14%,而另一間屢有狙擊前科的知名基金Argyle Street Management(ASM),亦持有13.9%,早兩個月先有傳這基金去信魏橋紡織(2698),挾佢地派40億特別息,再之前就狙擊中華汽車(0026),都係求息,唔知日後有冇同樣舉動呢?提提你大股東手持58%,地位雖穩如泰山,但如果ASM同金鷹聯手,或者有好戲睇。