從麥達斯看監管機構的隨意

2018-01-08 16:15:38
分享至Facebook 分享至Weibo 分享至LinkedIn 複製網址

港交所拋出的上市改革諮詢,恕青冰冒昧,目的只為吸引中概股回港上市,焦點更在於阿里巴巴回港作第二上市,不過若日後在港上市的股份交投,超越第一上市地點,有些豁免或優惠就不再適用。現時在港作第二上市的公司有七間,不過嘉能可(0805)COACH(6388)先後宣佈在110日及30日停止在港買賣,屆時只剩下5間,其一便是今星期搶盡風頭的麥達斯(1021)

雖然麥達斯個名好西化,但其實係內地公司,生產及銷售鋁合金產品,2004年在新加坡創業板上市,2006年轉為主板,2010年在港作第二上市,當時在港發行2.2億新股。在港第二上市的公司,交投量一向偏低,麥達斯在最近三年的成交量是453萬股、1211萬股及948萬股,作為一間發行股數有19億股的公司,百分比都低得可憐。

13日的中午,麥達斯宣佈其聯營公司在內地獲得一份新合約,屬總值26.8億人仔的地鐵列車供應合約,將於未來3年陸續交付。單刁係乜青冰覺得唔太重要,但隻股就由上午的收市價0.77元起步,一個鐘就升到1蚊,升三成本身都幾勁,但之後的半小時卻瘋漲至8.1元,雖然只是成交一千股,不過就升咗938%,見頂後5分鐘又插番去2.4元,高位蒸發7成,最後收市報4.18元,升435%,全日成交915萬股。

一日成交已是去年總成交的97%,非常癲,在新加坡那邊,13日都曾急升47%,以0.159坡元收市,折算為0.93港元。以現時的資訊發達,相信投資者不會不知兩者價格的差距,不過連翠如BB的聯旺(8217)去年全年都逾200億市值,港股市場有咩唔可能發生呢?

最令青冰奇怪的是,港交所對於一隻曾升9倍的股票,似乎不聞不問,公司連發一個不悉升因的通告也欠奉,咁係咩監管呢?青冰在CCASS持股數據發現,麥達斯在港的CCASS總貨量長期在1300萬至1550萬股,佔總股本1成都冇,但不知何故,在12日多咗115萬股,增幅明顯,又唔知點解,分別於12日及3日悉數沽出,當中有92萬股係13日沽嘅,雖然銀碼唔大,但都叫過肥年吧。

可能港交所專注上市改革,證監會專注打大老虎,所以此等小事大家睇完就算啦。

 



留言
珠船食正大灣物流

前兩日廣東發改委主任何寧卡,在廣東省人大會議的記者會上透露,大灣區發展規劃綱要已經完成,將在近期出台,連我地財爺波叔都在網誌抽水,大談大灣區對港青的意義,睇黎更具體的公佈,將在農曆年前後曝光。兩星期前推介的龍光(3380),冒著被大行及傳媒唱佢急須配股的淡風,仍然升逾三成,再睇另一隻大灣概念內房時代地產(1233),兩周升18%,佢地近日明顯跑贏同業,似乎醒目資金都認同青冰的推論,偷步入市。除了內房,珠船(0560)可能係一個冷門選擇。呢隻老牌紅籌,在港上市逾20年,一向都較為低調,所以資產長期折讓,但業務卻是穩定的,現金流高,息率唔錯,簡單啲講,穩而悶。港珠澳大橋即將通車,驟眼看珠船應該係受害者,因為大家可揸車自然少咗搭船,但其實佢地最煞食嘅係在港珠澳區域建立的港口物流網絡,及發展南沙物流倉儲。青冰在網上搵料,發現佢地在上月參與了國內知名網站搞的「決戰港股」路演,一間平常低調的公司,都增加曝光率,似乎係想發圍。路演中最有趣的環節係問答,有提問是單刀直入,問點解上月中有一日突然急升三成,是否有注資或重組進行,官方的答案當然話以公開的訊息為準,不過母公司的優質資產,包括南沙物流園、造船修理及金融企業,都會考慮。以佢回答的次序推論,南沙物流園應是首選。大橋通車會帶旺大灣區經濟,日後貨運量及進出口定必更頻繁,擁有已建立的物流倉儲肯定受惠,所以注入南沙物流園,係食正大灣概念。近年珠船長債甚低,只有數千萬,但在8月公佈的財表中看到,長債增至2.5億,手頭現金亦增至10億元,係咪將有動作呢?一隻平時悶開嘅股,忽然急升三成,成交有2100萬股,沒有通告亦沒有新聞,現時股價回至2.08,PB是0.8倍,如果要批股注資,不能賤賣國家資產,1倍PB是最基本,炒至2.59絕不過份,說到底,現時是大牛市,又有大灣概念光環嘛。溫馨提示番,15年大時代,悶股珠船在兩個月內由2蚊炒上4.85元,現價是否值搏,自己諗。

荒謬的股東會

2017年最後一個交易日,康宏股權爭奪戰,上演了一場股東投票權被「DQ」的劇目。持股達29.91%的郭曉群一方,於十月三十日要求召開股東特別大會,動議罷免包括曹貴子在內的原董事局成員,一場股東爭奪戰,郭氏一方按既定程序等足兩個月,原本連同另一股東陳佩雄的股權,足以扳倒原董事局,豈料台灣幫董事局使出「DQ」一招,宣布將郭氏相關票數視為無效,結果,明明夠票都變唔夠票。其後郭曉群的代表憤然向記者表示不滿:「因有狀書入稟法院,在未有法庭裁決前就宣布股票無效,係粗暴行為!」一如香港大部份股東會,被打壓的一方大聲疾苦,街坊小股東就鼓譟股東會加時作賽至兩個多小時,要求公司「準備午餐」,當公司安排好餐點招待後,小股東們即時「散水醫肚」。這個場面,和香港政局是否似曾相識?股東合法權利被剝奪,但事不關己的人只想着「一陣食乜好。」康宏事件源於謎網50,成件事複雜無比,就算經常閱讀財經版的讀者,也未必跟得貼,但群眾有一種分辯忠奸的天性,有法律訴訟在身的人,容易被視為「奸」。康宏環球在十二月中,向高等法院入稟控告包括兩名新主要股東郭曉群及陳佩雄等共28人,成功把一堆人在公眾心目中綑綁起來,然後再以同樣理由,在股東大會上DQ 郭曉群的投票權。事件的風眼人物曹貴子行縱成迷,但二零一五年入股的台資富邦金控,及二零一七年中加入的郭曉群,都想與康健創辦人曹貴子撇清關係。學政府口頭禪,事件已進入法律程序, 所以我只陳列事實: - 2015年8月,富邦入股康宏29.98%股權。- 2015年9月15日,主席王利民先生熱烈歡迎吳榮輝先生生加入董事會。委任執行董事- 富邦吳榮輝坐board 坐咗兩年多,而且是執行董事,亦因為他一早已坐了入BOARD, 所以他可以做股東會主席,亦可以出自願性通告,佔據了重要輿論陣地。- 2015年佳兆業停牌中,正在解決債權重組的問題,直至2017才復牌。這樣看來,誰跟曹貴子,王利民的淵源更深呢?- 郭曉群動議罷免的董事中,包括曹貴子在內,但DQ了郭的股份後,郭想安插親信入董事的計劃固然泡湯,吊詭的是王利民、曹貴子反而繼續留任。- 相比曹醫生的知名度,佳兆業郭氏家族一向佷低調,坊間連郭曉群的照片也沒有,至於把郭氏與曹醫生扯上的關鍵字是蔡志明。佳兆業2016年底成功重組,復牌後現在市值算內房股中較差的,也有300多億,本來人家在大陸的金融地產棋局也很大,奈何卻被描繪成別人的扯線公仔。香港股東會一向水平甚低,甚麼分拆、私有化,大部分小股東都是渾渾噩噩,「唔知開乜」。無論是港鐵投票決定高鐵撥款,還是領展研究出售物業,都有小股東舉手問「點解無點心」。股東一向不重視他們擁有的投票權,有時覺得大家爭拗「同股不同權」都嘥氣, 香港人一直沒有認真對待自己的投票權,政治如是,股票如是,都是台灣人經過民主洗禮,加上參考香港DQ風氣,比我們更識玩。好了,大陸人果然也不是省油的燈。郭曉群昨日入稟高院要求將上月底股東特別大會的結果推翻,包括要求法庭聲明康宏剝削郭氏的投票權屬不合法,並要求再開EGM。股東內訌升級,可能一般人的反應是「鬼打鬼,兩邊都唔值得幫」。法官大人,我想講,這件事的重點不是邊個係忠,邊個係奸,重點是「股東投票權如果可以被隨意剝奪,現屆董事局無論操守或能力如何,股東豈非永遠不夠票數扳動他們?股東維權難上加難?」和六名立法會議員被DQ案有點相似,政府先向最不討好的青年新政開刀,以宣誓誓詞打開缺口,成功 DQ 青政梁、游二人立下案例後,再一舉拿下另外四名泛民議員。當日政府DQ 青政,法律界人士吳藹儀便提醒過:「一般公眾多認為二人『咎由自取』,活該失去議席,但似乎對此案引起的問題,包括人大釋法,會造成什麼先例、對將來有什麼影響都不理,已失去興趣,而真正在意的只有幾名書獃子。」事隔不足一年,劇情發展下去,成個立法會監察政府的權力都被閹割,這便是權力被濫用而不警覺的深刻教訓。郭曉群向高院提交申訴狀,是否能否重奪其投票權,對香港股票市場來說影響深遠,DQ 股東投票權的先例一開,將來主席借機DQ其他股東維權的事情難保會陸續有來。一連串的司法訴訟,結果法庭會點判,對香港的金融管理有深遠的影響。註:配圖並非康宏股東會

煤轉氣受益龍頭股

今年要留意石油及天然氣板塊,今個星期油股已經先行一步,油價創兩年半高位,大摩唱好油股及油服股,甚至你話佢地係炒落後,全部都言之成理。去年油價57蚊起步,年中跌穿44蚊,年尾就重上60,全年升幅有數得計,咁舊年油股大落後唔升,都情有可原,再加上最藥煲的中石油(0857)係石油幫的根據地,政治上點都蝕底啲,所以如果你要買油股,中海油(0883)係不二之選。今次想講的係昆侖能源(0135),佢都係中石油嫡系,會唔會又蝕底呀?不過佢既有油又有天然氣,而兩者價格都係上升周期,業務主要在上游,絕對係食兩家茶禮,而最吸引青冰的,就是天然氣那邊的改革。內地為咗清新的空氣,煤轉氣雷厲風行咁進行,所以價格趨升,但由於供應不足,連帶國際天然氣價格都扯埋上去。上個月東北部嚴寒,更加出現氣荒,窮鄉要挨凍的新聞,及後就放寬番俾大家燒煤過冬,平息民怨。要深入分析天然氣板塊及改革,青冰未必係個皮,不過要睇昆侖,只需看幾個重點。2016年油氣唔掂,佢地下半年要蝕錢,全年只賺5億人仔,慘情,不過去年上半年回復正常,已賺24億,所以黎緊的全年業績,盈利增長好可能有10倍,因為唔好忘記下半年先係油氣價格急升之時。一直以來,管道輸氣收入係昆侖的殺著,2016年更佔8成盈利,但使用率長期100%,有強勁需求都冇得多賺,不過陝京四線管道在11月開始營運,輸氣能力激增7成,換言之在2018年,佢地可以賺更多。現時大行對佢的睇法都係較保守,所以如果公司有更多的消息公佈,如發盈喜或陝京四線的update,咁上調評級就變得順理成章。中石油咁弱都在今星期翻生了,昆侖現價是兩年高位,論強勢可能比中海油更強,候低收集,等待好消息吧。

北水主導的2017年

​​​​​​​今天是2017年最後一個交易日,無論是炒家還是散戶,都會幫自己埋數,順手檢討一下今年有咩做錯,下年要避免衰多次。執筆之時,恆指全年升35%,如果包埋股息,接近4成回報,騰訊(0700)升110%,如果你係傳統基金,揸得少過10%比重,很可能已代表跑輸大市,如果你係散戶,冇揸企鵝都未至於死罪,因為唔少車股手機股內房股,升兩三倍係等閒事。北水股係今年的主要贏家,以前傳媒及散戶成日笑人地係大媽,平保(2318)用行動回應你地港燦一句Naive!成萬億市值的匯控(0005)及工行(1398),都可以買到要舉牌,可見港股通的真正受益者,應該係機構投資者,尤其係險資,如果戰友今年坐到一兩隻北水愛股,相信肯定跑贏大市。回想去年底,投資氣氛係極差的,特朗普上場,美股位高勢危,聯儲局收水在即,睇好2017年股市的應是極少數人。雖然青冰在今年本欄首個文章,標題係「牛市在悲觀中誕生」,但問心當時只係覺得市場睇得太悲,有機會否極泰來,但斷估不到,這個泰來係咁勁的。文章話睇好手機股看淡內房,命中率只有一半,幸好青冰只有揸手機股冇去空內房,否則後果堪虞。下年係A股重要的一年,加入MSCI指數,走進國際市場,今年A股跑輸晒,那下年應該看漲吧?這可能係一個美麗的誤會,係嘅上證今年只升6%,在區內以至全球股市,都係不合格,但留意番滬深300指數全年升21%,富時A50指數亦升32%,茅台全年升110%,美的及格力兩隻電器股都升八九成,這些重磅白馬股絕對交到貨。點解上證跑輸咁多呢,原因係佔4%比重的第二大股份中石油,只升2%,換言之,你想上證下年生性,首先要令弱過藥煲的中石油彈起囉。油價回升唔少,內地煤轉氣措施初見成效,都係有利石油及天然氣板塊,加上佢地去年業績實在太曳,今年全年業績肯定強勁增長,至於邊隻看俏,就留待2018年先慢慢分析啦。

霸定位等大班派米

本以為港股可以高收完成2017年,點知一個又急又狠的獲利回吐,打亂晒大家的部署,由吃糊吃邊隻,變成周圍問人要唔要止蝕,前輩教落,有懷疑揸現金,如果戰友經過幾個浪,應該深明此道。年尾揀股,應該以防守為主,公用股又好似冇乜出息,咁就可以留意下,有出息或有特別息的和電(0215)。和電7月宣佈出售固網業務,作價145億,全部收Cash,並會錄得特殊盈利57.5億,復牌後一度高見3.22。市場一直憧憬公司會派特別息,但大班霍建寧在9月的特別股東會上話,都未仲未收到錢,派唔派要等12月董事會決定啦,自此之後就進入冬眠期,現時股價在2.90附近浮沉。按8月公司發出的通函所披露,假設交易於6月30日完成,公司的總資產及負債分別為251億及72億,即係NAV每股約3.72,手持現金將會係145億,折算係每股3.02。以現價約2.90嚟講,係唔合理架喇,每股仲低過現金值,呢啲情況在股仔就唔罕見,因為始終驚管理層會亂使錢,發展一些燒錢的業務,咁小股東就只會見財化水。現時長和(0001)持有和電66%股權,而誠哥私人持有7.27%,按理派特別息係對整個長和系有利,咁派幾多呢?在通函內提及,大概有49億借貸係要在2019年末到期,即使霍大班留起呢筆錢還債,現金仲有96億,即係話有2蚊係可以派的。長和持有31.8億股,誠哥有3.5億股,如派兩蚊就分別收到63.6億及7億,爽歪歪呢,早前8月電能(0006)派7.50特別息,長和都係收番62億而已,益咗唔少小股東及基金添,而和電這個case,長和系揸66%,真係冇乜理由唔派囉。計完一輪數,最後不確定的就是日子了。霍大班話12月決定,即係今個月囉,至於佢係指年結12月31日後開會決定,還是真係12月搵其中一日開會,大家只能靠估,但電能在今年1月首次宣佈派特別息,都係無啦啦忽然話要開董事會的,冇等到3月全年業績先派,既然有先例可援,霸定個位等大班派米,早好過遲啊。作者:青冰投資