如八達通只剩下車票

2018-03-09 11:37:48
分享至Facebook 分享至Weibo 分享至LinkedIn 複製網址

昨天港鐵(0066)公佈全年業績,最令人注意的,反而是八達通盈利竟然按年大減三成,係七年以來首次錄得倒退,事有湊巧,昨天支付寶香港就搞咗個啟動禮,焦點就係霍建寧都有代表長和出席,因為佢地去年就同螞蟻金服組合資公司,結合長和全港的零售網絡及支付寶的技術,爭做香港支付界的一哥。

八達通由搭地鐵必備而起家,一直擴展至各大小商戶,在小額支付上,基本上係完勝信用卡,「嘟」 一下就搞掂,係爽嘅。但可能係香港市場本身唔夠大,空間有限,八達通的發展有點停滯不前,你睇國內的支付寶及微信支付,市場大空間大,應用範圍廣,兩大巨頭自然更樂於掟錢投資,為的可能就係背後的大數據。

過江龍現時拍住誠哥,可謂非常著數,佢地除咗有百佳及屈臣氏等零售點,仲有電訊及電力公司,唔好忘記仲有一個龐大的地產網絡,私人屋苑的會所及旗下商場,如果全部逼你用支付寶,呢條數都幾襟計。

支付寶宣佈已經累積過百萬用戶

現時去食野或者買野,在電子支付上已經有好多選擇,青冰較常用Applepay,八達通就主要用作乘搭公共交通及出入停車場,尤其是後者,每當你到商場消費,獲得幾小時的免費泊車,用八達通去繳費處搞手續,係方便好多,如果日後Applepay或支付寶可以殺入停車場,青冰都唔介意使用。講到呢度,似乎八達通最後及最穩固的城池,就是公共交通,相信可見的將來,搭地鐵不可能用其他支付方法吧,但如果日後萎縮到得番搭車搭船,咁八達通就只會變番一張車票了。

如果港鐵是一間私人公司,肯定早幾年便已將八達通分拆出來,每年有兩幾億盈利,電子支付市場一哥喎,賣三十倍PE應冇問題,咁樣袋番一筆,對港鐵股東絕對有交代,可惜佢地大股東係政府,加價都會引來八方圍攻,如果有人敢提出分拆,政客亦肯定會將八達通跟領展(0823)當年上市相提並論,最後應該都係算把啦。

圖片來源:八達通網站/ unwirehk

 



留言
港鐵表現令市民失去信心

進入3月份,A股及港股反覆。受到李克強總理宣布2萬億元人民幣的減稅,減費計劃,用財政手段來刺激經濟。及中美貿易談判進入直路,美國白宮經濟顧問庫德羅(Larry Kudlow)表示中美貿易談判進展良好,期望3月底可以簽正式中美貿易協議。受到正面消息刺激,A股3月7日升至高位。上證綜合指數升至3,130的兩年高位,恒生指數在3月4日升至今年29,241點的高位。但是樂極生悲,上周五壞消息突然衝擊中港股市。A股上周五急挫4.4%,是兩年來最大單日跌幅。恒生指數大跌551點,29,000點守不住,250天移動平均線再失守。中國2月份出口急挫20.7%,消費物價指數升1.5%,都比預期差。2月份銀行新增貸款只有8,858億元人民幣,比1月份大跌3分之2。美國2月份非農業職位只增2萬份,差過預期的18萬,遠差過1月份的31.3萬份。很明顯,全球經濟增長在2018年見頂,2019年增長速度放慢,經濟運行從高位回落。中港股市似乎未受到上周五(3月8日)跌市影響,周一(3月11日)中港股市反彈。到2月中很多藍籌公司已經公布了業績,其中最受注意的是港鐵。港鐵過去一年受到沙中線工程及紅磡站負面消息拖累,多名工程有關高級員工離職,主席馬時亨不肯續約,行政總裁梁國權提早一年退休。港鐵宣布由嶺南大學校董會主席歐陽伯權接任馬時亨,做港鐵主席。在港鐵工作24年的高層,負責中國業務,港鐵車務總監,對港鐵營運及工程熟識的金澤培接任行政總裁。港鐵宣布2018年盈利跌4.9%,比預期好。各證券商紛紛調高港鐵評級,主要是樓價上升,預期港鐵未來物業發展將會帶來龐大盈利。港鐵股價逆市上升,一度升至47元的歷史高位。如果分析員不熟識香港,對港鐵最近一年的發展,一定會覺得港鐵是一間完美的上市公司,是香港藍籌股的典範。管理層對過去兩年發生的沙中線,紅磡站的工程問題完全避而不談,好像在另一個星球,和港鐵完全無關。更加不談港鐵可能面對的法律訴訟,或者巨額罰款或賠償。只報喜不報憂,好像在北京開兩會的報告一樣,令人十分失望。但事實上大家都知道,過去一年港鐵受到沙中線工程及紅磡站問題困擾。總承辦商被揭發剪短鋼筋,之後港鐵進行的調查中,再發現更加多違規問題。紅磡站的施工報告RISC,有60%不知所踪。這施工報告是任何大型工程必須的進度報告,由承辦商填寫報告,港鐵驗收,工程才可以進行。紅磡站失去60%的施工報告,代表港鐵根本沒有跟進工程。沙中線的工程問題,完全因為二判公司主席潘鴻烈不肯同流合污,認為工程不安全,不肯妥協,事件才被揭發。港鐵真正需要的是一個可以徹底進行監工的工程師,查清每一個建築工程,每一個步驟,及驗收每一件建材,每一個工程。金澤培在港鐵工作期間,正是這些問題出現,他是否適合人選,調查自己任內出現的工程問題?另一方面,港鐵工程上出現這樣多問題,肯定不是單一事件,一定要查個水落石出。港鐵需要一位主席,有偵查及調查經驗,好像是警察或廉政公署的高層,有查案能力的人,才能徹底查個一清二楚,到底問題出在哪裡,同時提出怎樣進行改革,把腐敗的文化清除,以免將來出現同樣情況。港鐵在1970年代由英國人譚臣(Norman Thompson)成立,一直以來都給人一個高效、廉潔的公營機構。但過去兩年把40多年建立的形象,完全洗掉,令到香港市民失去到港鐵的信心。

歷久不衰的AH概念

A股市場成交突破一萬億,已經唔係突發新聞,這個幾星期已有數次,旺市已直逼2015年大時代,但論孖展額及主要指數的累積升幅,同當年仍有好大段距離,但今次同上次略有不同,就係外資參與的程度高咗好多,這也拜MSCI增比重所賜,好友及大媽自然是磨拳擦掌,師兄弟終於返晒黎喇,淡友就梗係話股市純為資金推動,完全沒經濟數據支持啦。每逢A股爆旺,總會有一個歷久不衰的炒作概念,就是A、H差價,今個浪暫時仍較少人提及,但如果A股續旺,遲早又會拎返出黎炒。之所以話係歷久不衰,因為道理顯淺易明,A股股價折回港元後,亦大幅高於H股,所以資金會捨A而取H,H股就會炒落後而追上。同一個資產,在兩個地方差價大,會引來套利活動,從而將差價收窄,這是我們從財務書本上學到的東西,但當中最大的假設,是資產在兩個地方都可以自由流動,仲可以高沽空低買入,先會成立。互聯互通在2014年11月開啟,的確有助兩地資金互通,但由於外資沽空的限制多,內地劵商又唔敢貿然借貨畀外資沽空,所以個沽空機制係形同虛設,再講,內地資金同大媽對沽空亦都係避之則吉,大佬呀一陣畀阿爺扣上惡意沽空的帽子,真係賺幾多都補唔返。所以A股長期高過H股,都係常態,即使以前有人話互聯互通最終會收窄兩地差價,但你開個A、H股差價睇,又或者睇恆指AH股溢價指數,就知係長期如此。舉幾個誇張的例子,近日最狂的幾隻大市值A股,人保A在1月底係5.78人仔,昨天已升到12.83,累升122%,中信建投A股自1月底更累升167%,不過人保H(1339)及中信建投H(6066)同期只升13%及34%,係呀,係好落後呀,但這個星期的差價仲拉闊咗添。相關A股應監管機構提問,都發出了風險提示,內地中信證券仲向人保A股發出沽售評級,但仍然都按不住亢奮。以上兩隻H股係好平,只係A股的3折,又有港股通,買賣亦方便,但內地資金就是對H股沒興趣,寧願留戀一個每日漲10%的地方,都唔黎香港炒吓落後,各位港燦股東真係要有無比耐性,又或者等大行打救,吹奏A、H差價概念啦。

細看合和私有化

合和(0054)私有化正式公布私有化價格,係38.8元。由於合和為老牌華資股,講真新一輩對佢認識不深,又冇乜特別概念可炒,應該提唔起興趣去買,但其實都不失為一個好的case study,今次就寫佢吧。私有化主要有兩個形式,全購及協議形式。要約人在出價時的通告中,會清楚列明當時的「一致行動人士」的持股數目及「無利害關係股東」的持股數目,無利害關係股東持股數字十分重要,因為日後投票及計數,就是用這個作基數。在全購的情況下,無利害關係股東持股中,必須有90%以上接納,便算成功,可以強制性收購餘下股份;如是協議形式,首先要得到出席投票的無利害關係股東75%贊成,及少於所有無利害關係股東10%反對,才會獲得通過,而以上只是限於在香港註冊的公司,如果在開曼群島或百慕達等離岸地方註冊的話,要加上一個最辣的條款,就是出席投票的無利害關係股東,在人數上至少要有50%贊成,亦即係數人頭。其實以往香港註冊的公司都要數人頭,但08年電盈提出私有化時,爆出種票事件,即使私有化成功,但證監提出上訴,最終將私有化拉倒,促使政府在14年修訂公司條例,取消數人頭。今次提私有化的要約人,是主席胡應湘夫婦的私人公司,董事人員只是他倆,並沒有包括兒子胡文新,如私有化成功,持有3.34%股權的阿仔,都要被逼沽貨了。雖然阿仔係被收購,但由於在法理上,仍屬於一致行數人士,阿仔係冇得投票的。究竟是否不和,留待戰友自己思考吧。於公佈日期,合和總發行股本有8.68億股,要約人財團(包括胡應湘夫婦、家族成員、信託及老臣子何炳章)共持有3.2億股,沒參與要約的胡文新、其公公及舅父三人共持約3000萬股。以上全部是一致行動人士,共持3.5億股,約40.41%,換言之非利害關係股份就有5.17億股,約59.59%。根據協議形式的規則,要通過就要出席股東的75%贊成,當全部出席,就要3.877億股,反對票就以全部無利害股東計,即有5176萬股反對就可以拉倒。一般來說,全購是較易達成,用市場術語,只要收得夠乾,歸源歸邊,計好數出價,成功率較高,用協議形式,始終涉及出席會議的股東投票甚至要數人頭,變數大較難掌握,胡生捨易取難,理應是好有信心。有行家分析得好,指合和已上市46年,好多老股東或移民或去世,繼承者根本唔知有持股,要達90%的門檻其實更難。另有分析指,基金Southeastern Asset Management持有6000萬股,其實佢的一票已足以否決議案,所以通過機會不大,但又要咁睇,咁大單嘢,大家都識計的數,胡生會不作事先摸底就去出價嗎?亦有指胡生斥二百億私有化,係沉重負擔,但合和本身持有凈現金83億,而最近十年派息從無間斷,胡生收的股息已達60億元,七除八扣之下,其實真正掏荷包的,遠比大家想像的少。說回作價,雖然38.8元是11年高位,但仍較每股NAV存有35%折讓,是否好價,真係兩睇,但就不是志在必得價囉,最弊就係通告寫明不會加價,小股東真係陷於兩難啊。早前國浩(0053)私有化,同是採用協議方式,同是股價長期折讓,出價同是較NAV折讓約三成,最終是失敗而回。睇返市場反應,似乎都認同此點,執筆之時,股價是32.90,距私有化作價有15%,近年成功私有化的例子,都甚少復牌後同作價差咁遠,這亦反應了市場看淡成功率,先沽為上,當然,距投票日子尚遠,以2018咁多出奇不意之事,Never say Never啊。

從閱文來到寶寶樹

戰友位公子下星期就一歲生日,大家不禁老土地慨嘆時光飛逝,還記得一年前這刻還在悉尼旅遊,行程唔緊密但有點忙亂,就是因為忙著越洋沽售當時火熱的IPO雷蛇(1337)及易鑫(2858),還有就是上機前以開市價即daylow價90元沽出閱文(0772),一年過去,無論在上市首日用咩價沽出,現在回看也難免失笑。去年十一月這IPO三寶,最多人認同的必是閱文,無論從概念、血統及前景,都屬優秀,只係估值貴,當日以歷史市盈率100倍上市,首天股價仲升多一倍,過千億市值但只賺5億幾,但坊間分析仲係貴得有道理,因為增長是幾何級數攀升,加上有騰訊加持。早幾個月公佈的半年業績的確高增長啊,半年賺5億人仔,但股價已從高位腰斬。至於雷蛇及協鑫,上市前已經係蝕錢,受到熱捧只是時勢造英雄,加上有誠哥及騰訊效應。雷蛇這年來好似出咗幾款手機,亦動用了近億元現金去回購股份,但現價仍比高位跌78%。而協鑫呢,坦白說青冰在一年前及現在,都係唔太了解佢做乜的,只知道上市前蝕錢,現在都係,最離奇係從經營所得的現金流,現仍是負數,所以從上市首天的10蚊跌至2蚊,非常合理。IPO市場,氣氛決定一切,甚麼時候要合埋眼抽,甚麼時候要細讀本招股書,也不難分辨,現時氣氛咁差,仲堅持要招股的,急需資金是固然,估值就肯定低。早幾日有戰友問寶寶樹(1761)得唔得,心諗概念都算獨特喎,是否國內版的Babykingdom呢?所以即刻去睇吓本招股書,點知睇完涼了半截,呢隻又係蝕住錢上市,但扣除22億的金融負債公允值變動,上半年仲有1億人仔的經營利潤,又因為這批價值近87億的「附有優先權的金融工具」,佢地截至6月底,權益額是負68億,權益,即係資產減負債囉,換言之,即係負資產公司,咁你又唔使太驚,只要佢地成功上市,這負債會轉換成股本,即係話即使下限6.12元定價,權益額即時升至31億。如果公司未能在2020年10月前上市,持有這些"負債"的股東,包括阿里巴巴,就有權要求公司或始創人回水的,換言之上市就是勝利,巴巴亦安然持有近一成股權喇。睇完咁多嘢,相信戰友對這個babykingdom概念的觀感,一定好極有限,無計啦,只嘆你生不逢時,一年前出世,有巴巴加持,肯定熱爆飛天,甚麼負資產負現金流,都先孖為敬呀。

大股東唔想你買

騰訊(0700)及阿里巴巴頻頻佈局實體零售行業,百貨公司係其中一環,巴巴仲私有化銀泰百貨及入股高鑫零售(6808)添,本來百盛(3368)身為內地百貨公司,有炒作概念,青冰在去年亦有推介,貪佢有併購及私有化誘因,奈何搞咗成年都只有間歇性炒作,未成大器,上星期五公佈的業績,似乎都更清楚顯示了大股東的意途,就係唔想你買。百盛16年底賣北京物業,袋咗23億人仔,已經令市場憧憬佢地會派特別息,不過佢地去年公佈全年業績,只係象徵式派兩仙,收番黎的現金,全部去晒保本存款,好啦,因為你有5億美元負債,可能你留錢還債呢,等了又等,佢地上月公佈,向債券持有人回購債券,最後只有一半持有人應允,都叫做成功減債吖,不過上星期從業績公告中睇到,原來佢地係問銀行借錢去回購債券,但留意番佢地保本存款仍有32億人仔,亦無啦啦多咗16億金融資產,手頭咁多閒錢,點都唔應該問銀行伸手去還債囉,至於個16億係乜,遲啲出年報可以再睇真啲。去年純利係虧損1.35億人仔,一睇就唔開胃,但當中有1億係一單訴訟案的和解費用撥備,而此案複雜中帶點可笑,當中牽涉幾間國內公司,而重點卻係原訴人是一間馬來西亞公司,亦係大股東鍾廷森旗下的公司,換句話說,就係自己人告番自己人,來龍去脈誰對誰錯不用深究,本身件案係百盛勝訴,而馬來西亞公司決定上訴,就以這個窮追的舉動黎睇,都已經夠搞笑,按通告講,最後和解金額應該唔止1億,對於百盛的小股東來說,就肯定笑唔出。不過你又唔需要擔心,百盛的小股東包括同業金鷹(3308),13年舉牌後持續增持,依家已經持有14%,而另一間屢有狙擊前科的知名基金Argyle Street Management(ASM),亦持有13.9%,早兩個月先有傳這基金去信魏橋紡織(2698),挾佢地派40億特別息,再之前就狙擊中華汽車(0026),都係求息,唔知日後有冇同樣舉動呢?提提你大股東手持58%,地位雖穩如泰山,但如果ASM同金鷹聯手,或者有好戲睇。